Монгол Улсын гадаад худалдааны бодлого
Монгол Улс гадаад худалдаанд нээлттэй байх, худалдааг хөнгөвчлөх, эдийн засгийн тогтвортой өсөлт, өрсөлдөх чадварыг дэмжих, экспортыг төрөлжүүлэн, уул уурхайн экспортын хамаарлыг бууруулж, уул уурхайн бус нэмүү өртөг шингэсэн бүтээгдэхүүний экспортыг нэмэгдүүлэх бодлогыг баримталж байна.
Монгол Улс 1997 онд Дэлхийн худалдааны байгууллага (ДХБ)-ын гишүүнээр элсэн, чөлөөт бөгөөд ил тод худалдааны зарчмыг баримталж ирсэн.
Монгол Улсын гадаад худалдааны бодлогын үндсийг Үндэсний аюулгүй байдлын үзэл баримтлал (2010), Монгол Улсын Гадаад бодлогын үзэл баримтлал (2011), Монгол Улсын дунд хугацааны хөгжлийн “Шинэ сэргэлтийн бодлого болон Алсын Хараа-2050” бодлогын баримт бичгүүдэд тусган, Засгийн газрын шийдвэрүүдээр хэрэгжүүлж байна.
Экспорт: Нэг улсын дотоод зах зээлээс бүтээгдэхүүн, үйлчилгээ болон бараа материалыг гадаадын зах зээлд гаргаж, бусад улсад борлуулж байгаа үйл ажиллагааг хэлнэ.
Монгол Улсаас экспорт хийхийн давуу тал
- Монгол Улс байгалийн арвин нөөц баялагтай. Нүүрс, зэс, алт, төмрийн хүдэр зэрэг ашигт малтмал ихтэй, мал аж ахуйн гаралтай ноолуур, ноос, арьс шир, мах, махан бүтээгдэхүүн эскпортлох бүрэн боломжтой. Мөн органик, байгальд ээлтэй бүтээгдэхүүн үйлдвэрлэх, өрсөлдөх чадвартай.
- Худалдааны нээлттэй бодлоготой. Монгол Улс Дэлхийн худалдааны байгууллагын (ДХБ) гишүүн бөгөөд олон улсын худалдааны нийтлэг дүрэм, зарчмыг мөрдөж ажилладаг. Тариф худалдааны ерөнхий хэлэлцээрийг хэрэгжүүлж худалдааг хөнгөвчлөх, худалдаан дахь саад бэрхшээлийг бууруулахыг зорьж байна. Гаалийн үйл ажиллагаа, зөвшөөрөл, гэрчилгээжүүлэлтийг бүрэн цахимжуулсан.
- Бүс нутгийн интеграцид нэгдсэн, том зах зээлүүдтэй ойр байрлалтай. БНХАУ болон ОХУ-тай хил залган оршдог. Евроазийн эдийн засгийн холбооны гишүүн орнуудтай Худалдааны түр хэлэлцээр (2025), Япон Улстай Эдийн засгийн түшлэлийн хэлэлцээр (2016), Ази номхон далайн худалдааны хэлэлцээр (2020)-ийг тус тус байгуулан, Европын Холбооны Хөнгөлөлтийн системд хамрагддаг зэрэг нь гадаад зах зээл рүү бараа бүтээгдэхүүнийг тарифын хөнгөлөлттэй экспорт хийх бүрэн боломжийг олгож байна.
- Уул уурхайн бус экспортыг төрөөс дэмждэг. Олон улсад өрсөлдөх чадвар бүхий ноолуур, ноос, мах, байгалийн гаралтай органик бүтээгдэхүүний экспортыг нэмэгдүүлэх, нэмүү өртөг шингээн өндөр чанартай бүтээгдэхүүн үйлдвэрлэхэд дэмжсэн бодлогын болон санхүүгийн дэмжлэгийг төрийн зүгээс үзүүлдэг.
Эдгээр давуу талууд Монгол Улсын экспортын чадавхыг нэмэгдүүлж, гадаад зах зээлд бүтээгдэхүүнээ өрсөлдөхүйц нөхцөлөөр нийлүүлэх боломжийг бүрдүүлдэг.
